Arne Mann the Elena Lacková
kerdo: 10. 01. 2023 09:21 opre kerdo: 10. 01. 2023 09:24
E archivno fotografija sikhavel la romaňa lekhavňa Elena Lacková u le romistas Arne Mann. E analogovo fotografija sas kerďi 12.6.1998 angle bari skľepa Dargov andro foros Košice. O autoris savo iľas e fotografija nane pisimen.
PhDr. Arne B. Mann, CSc. hino o maškar o šerutne slovaťika etnologa, o romistas, bešel Bratislavate. Agorinďas e Filozoficko fakulta UK Bratislavate, e špecijalizacija e džaňiben pal e nacija (1978), o titulos PhDr. Chudľas andro berš 1980 u CSc. andro berš 1997.
Kerelas buťi sar o džaňibnaskro buťarno pre Katedra vaš e etnologija pre Filozoficko fakulta UK Bratislavate u le beršestar 1983 andro Inštitutos vaš e etnologija pre Slovaťiko džaňibnaskri akademija.
Leskri džaňibnaskri aktivitia hiňi pal e romaňi historija u the romano holokaust, o spiritualno paťaben le Romengro, lengri socijalno u spiritualno kultura, o vastengre buťa u profesiji u aver.
Kerel buťi sar o eksterno pedagogos pre Filozoficko fakulta UK Bratislavate (1955 dži akana), pre Filozoficko fakulta UKF Nitrate (2001 – 2009), u pre Fakulta vaš o humanitna študiji (angomis o Inštitutos vaš o fundamentalno džaňiben) UK Prahate (1998 – 2016).
Elena Lacková uľiľlas 22. marcoste 1921 Bara Šarošate. Phirel maškar o nekbareder romane lekhavne. Peskri buťa pisinelas vaš o čhavore the vaš o phureder genavne. Agorinďas e Fakulta vaš o socijalna džaňibena pre Karlovo univerzita Prahate (1970). Pisinelas the proza u drama. Savoro dživipen sas e aktivistka u vazdelas le Romen. Muľas 1. januariste 2003 andro Košice.
Khatar:
amariluma.romanokher.sk/encyclopedia/mann-arne-b-phdr-csc/
e kategorija: čitratuňipen
o tagi: sekularno digitalno esteticko in persona fotografija Arne Mann Elena Lacková savorenge interno
Dezider Banga
kerdo: 19. 12. 2022 14:33 opre kerdo: 19. 12. 2022 14:33
E archivno fotografija sikhavel le romane lekhvanes, scenaristas u dramaturgos Dezider Bangas. E analogovo fotografija sas kerďi 22.8.1998 pro romano festivalos. Kaj sas o festivalos, oda nasas pisimen paš o analogovo filmos, aňi autoris, savo kerďas e fotografija. E fotografija sas andro ľila Romano nevo ľil g. 416-423/2000 pre sera 8 paš o lekhaviben Nevi kolekcija romano poetostar.
Dezider Banga uľiľlas 24.8.1939 andro Hradište. Pre zakladno the maškarutňi škola phirelas andro Uhorské paš o Poltár. Pal e pedagogicko škola andre Krupina sikhľolas sikhavneske. Sikhľiľas the e slovaťiko čhib the e historija pre Filozoficko fakulta pre Komenskyskri univerzita Bratislave. Sikhavelas sar o maškarutňa školakro profesoris pro gymnazium Trebišovoste u deš berša paľis sas o dramaturgos andre Literarno redakcija andre Slovaťiko televizija andro Košice. Andro berš 1979 geľas andre Bratislava u sas redaktoris, le beršestar 1986 sas o šerutno redaktoris andro khetaňibnaskro čhoneskro ľil Nová cesta (Nevo drom), kaj sas dži kana o perijodikum agorinďas andro berš 1990. Ss o šerutno andre themutnengri organizacija Romaňi kultura, o šerutno redaktoris andro kulturno-khetaňibnaskro čhoneskro ľil Roma u o čhavorikano magazinos Luluďi, savo delas avri leskri organizacija. Kerel the o biznis andre polygrafija – phirel leske o fabrika kaj pen keren o kňižki.
Andro berš 2009 chudľas o učo themeskro moľipen – E medaila Ľudovítoskri Štúroskri III. učipen vaš o bare doresipena andre kultura, špecijalno andre romaňi literatura.
Khatar:
www.litcentrum.sk/autor/dezider-banga/zivotopis-autora
amariluma.romanokher.sk/encyclopedia/banga-dezider/
e kategorija: čitratuňipen
o tagi: sekularno digitalno esteticko in persona fotografija Dezider Banga savorenge interno
Elena Lacková romaňa kapelaha
kerdo: 19. 12. 2022 14:10 opre kerdo: 19. 12. 2022 14:12
E fotografija sikhavel la romaňa lekhavňa Elena Lacková le romaňa kapelaha (o kapelakro nav nane pisimen) andro gav Svinia. E fotografija sas thoďi andro g. 340-347/1998 pre sera 8 paš o lekhaviben le tituloha O bičhade.
E kapela, kaj sas Ján Čikala, Alexander Polák, Daniel Bendík u Miroslav Červeňák sas pro drom andro gav Liptovské Sliače, kaj bašavenas pro kidipen O dajakro ďives pro Liptov Sliače 98. Pro kidipen vakerelas the e Elena Lacková.
E fotografija sas kerďi nabut pal o baro paňi, savo iľas o gava Jarovnice the Svinia.
O nav le autoriskro la fotografijakro nane andro ľil pisimen. E analogovo fotografija sas kerďi andro berš 1998 andro gav Svinia vaš o romane ľila Romano nevo ľil.
Khatar:
Šilanová, Daniela. 1998. Poslovia. Romano nevo ľil g. 340-347/1998, sera 8.
e kategorija: čitratuňipen
o tagi: sekularno digitalno esteticko in persona fotografija Elena Lacková savorenge interno
Katalin Papp
kerdo: 19. 12. 2022 13:45 opre kerdo: 19. 12. 2022 13:53
E romani čitratuňi Katalin Papp uľiľas andro berš 1958 andro Lučenec. Geľas andre emigracija andro Ňemciko, odari lakro drom sas andro USA, kaj pal o študijum pre Škola vaš o vizualno artikaňiben andro New York chudľas andro berš 1996 o titul e magisterka vaš o čitratuňipen. Sar o špecijalno asistentka sas pre verejnou uči škola SUNY Farmingdale andro New York, sikhavelas pro Nassau Community College the Queensborough Community College. O čitratuňipen kerelas the andro Ungriko u Ňemciko, kerelas peskre čitratuňipnaskre worskhopa. Lakre buťa hine o o čitripen (2D produkcija), kerel the o skulpturi u keramika (3D produkcija).
E fotografija kerďas o romano fotografos Jozef Ferenc. E digitalno fotografija sas kerďi andro berš 2006 andro Lučenec, prekal o interviju vaš o Romano nevo ľil.
Khatar:
Čonka, Roman. 2006. Rozhovor s Katalin Papp. Romano nevo ľil č. 777-783/2006, str.14-15
Zdařilová, Eva. 2010. Rozhovor s Katalin Papp. Romano džaniben 17 (2): 160–166.
fineartamerica.com/profiles/katalin-papp
e kategorija: čitratuňipen
o tagi: sekularno digitalno esteticko in persona fotografija Katalin Papp savorenge interno
Jaroslav Cicko
kerdo: 29. 06. 2022 12:52 opre kerdo: 29. 06. 2022 12:53
Jaroslav Cicko hino o prindžardo romano čitratuno, kerel the o plastiki, save kerel nekhbuter kaštestar, no the barestar.
Uľiľas 25.3.1939 andro Martin u muľas 18.11.2010 andre Horná Štubňa andro okres Turčianske Teplice.
Andre Fabrika vaš o phare mašini andro Martin kerelas buťi sar inštrumentaris, andro martinsko Štúdio vaš o naprofesijonalna čitratune kerelas peskre buťa kaštestar. Sas o lektoris pro simpoziji vaš o naprofesijonalna čitratune.
Andro berš 2000 sikhavelas peskre buťa u save buter dromenca len kerel andro Ňemciko, Čechiko, Španielsko, Francuziko u Talianiko.
Nekhbuter sas leskro motivos e džuvľi andro savore lakre formi.
E fotografija kerďas o romano fotografos Jozef Ferenc. E digitalno fotografija sas kerďi andro berš 2005 andre Bratislava kana pen denas o moľipena le žurnalistenge pro kidipen Baroro, savo kerelas o Kher zorarďa manušňakro rajipnastar Slovaťiko republikakro vaš o romane komuniti. Pre fotografija del o moľipen, e kaštuňi socha, la dramaturgičkake TV Markíza D. Paulovičovake.
Informaciji:
RNĽ č. 688-694/2005
e kategorija: čitratuňipen
o tagi: sekularno digitalno esteticko in persona fotografija Jaroslav Cicko savorenge interno
Sestra Atanázia
kerdo: 29. 06. 2022 12:46 opre kerdo: 29. 06. 2022 12:46
E phen Atanázia, lakro purano nav Mária Holubová, uľiľas andro gav Svetlice paš o Humenné. Phirďas pre Maškarutňi sasťipnaskri škola andro Prešov, kaj pes dochudľas kijo paťaben. Pal e maturita chudľas e buťi andro Inštitutos vaš o socijalno keriben andro Bardejov, kaj kerenas o khangerakre pheňa andal o sunto Bazil Baro konventos. Andro berš 1972 garudes uštaďas andro novicijatos, andro berš 1973 diňas peskro jekhto solach andro konventos. Pre uči škola phirďas pre Cyrilo-metodsko teologicko fakulta andro Spišské Podhradie. Kerel e buťi pro romano sidlisko Poštárka andro Bardejov andre maťersko u zakladno škola.
E fotografija kerďas o romano fotografos Jozef Ferenc. E digitalno fotografija sas kerďi andro berš 2005 andro Bardejov kana sas o vakeriben pal o aktiviti pre Karačoňa pre Poštárka.
O informaciiji:
RNĽ č. 725-729/2005
www.employment.gov.sk/files/slovensky/uvod/informacie-media/aktuality/uspesne-romske-zeny-profily.pdf
e kategorija: čitratuňipen
o tagi: sekularno digitalno esteticko in persona fotografija Sestra Atanázia savorenge interno
Erika Šajgalová
kerdo: 29. 06. 2022 12:40 opre kerdo: 29. 06. 2022 12:40
Erika Šajgalová hiňi e čitratuňi, savi barolas andro čhavorikano kher, bešel u čitrinel andro Poprad. Andro beš 2003 chudľas te phirel pre Maškarutňi džaňibnaskri škola andro Košice, o študijum andre špecijalizacija Dizajn – e buťi le kašteha agorinďas la maturitaha. Paľis phirelas pre Maškarutňi pedagogicko škola andro Košice, vašoda, hoj kamelas te kerel e buťi le čhavorenca angle škola. Hiňi talentovano portretistka, nekbuter kamel te čitrinel le čhavoren. Kerďas o ilustraciji andro sikhľuvibnaskre kňižki vaš o čhavore: O čhavorikano šlabikaris u Lošale ľiterici. Lakre buťa sas sikhade pro vistavi save kerelas e Themutnengri asocijacija Jekhtane-Spolu kaj e šerutňi sas e Daniela Hivešová-Šilanová.
O dokumentarno filmos savo kerďas e kašakri filmovo firma ATARAX savo pes vičinel ERIKA sikhavel lakro dživipnaskro drom u zoralo kamiben te sikhľol.
E fotografija kerďas o romano fotografos Jozef Ferenc. E digitalno fotografija sas kerďi andro berš 2006 andre Rimavsko Sobota kaj o filmova dokumenta pal o štar romane čitratune sas prezentimen.
O informaciji:
RNĽ č.738-741/2006
e kategorija: čitratuňipen
o tagi: sekularno digitalno esteticko in persona fotografija Erika Šajgalová savorenge interno
Vojtech Kökény
kerdo: 29. 06. 2022 12:34 opre kerdo: 29. 06. 2022 12:34
PhDr. Vojtech Kökény (Kökény Kotyer Béla) uľiľas andro berš 1956 andre romaňi osada paš o gav Cakov, nadur khatar e Rimavsko Seč, andre lavutarengri fameľija. But berša kerelas e buťi sar o buťarno pro ačhavibena pre Slovaťiko the avri. Kerelas o čitratuňipen, e politika the o lokalno aktivizmus. Sar korkoro andro jekh vakeriben phenel, načitrinďas but buťa. Čitrinelas le ceruzkenca, paňeskre the oľejovo farbenca. Peskre buťa sikhavelas nekbuter andre Romaňi phirďi galerija, savi kerelas e Themutnengri asocijacija Jekhetane-Spolu kaj e šerutňi sas Daniela Hivešová-Šilanová. Le beršestar 1995 dži o 2005 kerelas buťi sar o socijalno buťarno pre Okresno kher andre Rimavsko Sobota.
Sas o dženo andre sera Romaňi themutnengri inicijativa (ROI), paľis geľas andre sera Romaňi inteligencija vaš o jekhetano dživipen (RIS) u e politicko karijera agorinďas andre Romaňi kolačno sera (SRK). Andro beš 2005 kerďas e kandidatura pro šerutno andro Banskobystricko samospravno krajos.
E fotografija kerďas o romano fotografos Jozef Ferenc. E digitalno fotografija sas kerďi andro berš 2006 andre Rimavsko Sobota pre prezentacija kaj sas o dokumenta pal o štar romane čitratune.
O informaciji:
RNĽ č.738-741/2006
e kategorija: čitratuňipen
o tagi: sekularno digitalno esteticko in persona fotografija Vojtech Kökény savorenge interno
Alexander Bohó
kerdo: 29. 06. 2022 12:05 opre kerdo: 29. 06. 2022 12:05
Pre fotografija hino o profesijonalno romano čitratuno Alexander Bohó. Uľiľas andro Brezno, andre fameľija pandže čhavorenca. Sikhľolas kijo doc. J. Jánoška u profesoris F. Ondro e slobodno grafika u graficko dizajnos. O čitripen sikhľolas paš o akademicko čitratuno F. Kráľ andro berša 1979 – 1985. Andro berš 1966 agorinďas o študijum pre Filozoficko fakulta pre Univerzita Komenský Bratislavate, e špecijalizacija e džaňibnaskri historija.
E fotografija kerďas o romano fotografos Jozef Ferenc. E digitalno fotografija sas kerďi andro berš 2006 andre Rimavsko Sobota kana sas e prezentacija pal o filmova dokumenta pal o štar romane čitratune.
O informaciji:
RNĽ č.738-741/2006
e kategorija: čitratuňipen
o tagi: sekularno digitalno esteticko in persona fotografija Alexander Bohó savorenge interno
Ján Šándor
kerdo: 29. 06. 2022 10:47 opre kerdo: 29. 06. 2022 11:10
Pre fotografija hino o romano lekhavno Ján Šándor. Uľiľas andro berš 1948 andro Brno (puraňi Čechoslovakia, akana Čechiko republika). Peskre 16 beršendar dži kana namuľas bešelas andre Prievidza. Savoro dživipen sas buťarno.
Leskre lekhavipena sas le beršestar 1979 andro magazina Železničiar, Bosorka, Smer dnes, Prieboj, Romano nevo ľil, Sam adaj, Romano džaniben. Leskro kňižno debutos sas o paramisa the o charne lekhavibena tel o nav Romano suno (2004). Andro berš 2008 e asocijacija Jekhetane-Spolu diňas avri e kňižka paramisenca savi pes vičinelas Kaľi ruža, slovaťika the romanes. Jekhetanes diňas avri 10 kňižki.
Sas o dženo andro Slovaťiko lekhevnengri asocijacija.
Andro berš 2017 leske In memoriam dine o moľipen Roma Spirit vaš o savoro dživipnaskro literarno keriben u vazdipen la romaňa kulturakro.
E fotografija kerďas o romano fotografos Jozef Ferenc. E digitalno fotografija sas kerďi andro berš 2005 andre Prievidza, kana bolde leskri kňižka.
O informaciji:
ŠÁNDOR, Ján. Čierna ruža / E kaľi ruža. Prešov: Jekhetane-Spolu Prešov, 2008, 132 s. ISBN 978-80-968744-2-2
www.romaspirit.sk/rocniky/rocnik-2017/nominovani/jan-sandor-prievidza/
e kategorija: čitratuňipen
o tagi: sekularno digitalno esteticko in persona fotografija Ján Šándor savorenge interno
