Aneta Duždová
kerdo: 09. 09. 2020 13:47 opre kerdo: 27. 11. 2020 01:47
Aneta Duždová hiňi e šerutňi giľavňi andre vokalno-inštrumentalno grupa Sabrosa. E kapela pes kerďas andro gav Raslavice andro okres Bardejov, o šerutno sas o manažeris František Gall. Jekhto o džene sas trin giľavne u inštrumentalistki, andro lengro repertoaris sas nekhbuter o tradična romane giľa. Paľis o repertoaris buchľarde the moderno kompozicijenca khatar o prindžarde interpreta.
e kategorija: vizualno čitratuňipen
o tagi: sekularno digitalno esteticko in persona fotografija Aneta Duždová Sabrosa savorenge interno
Eva Adamová
kerdo: 07. 09. 2020 09:26 opre kerdo: 27. 11. 2020 01:47
Eva Adamová sas andro Teatro Romathan le beršestar 2002. Jekhto sas e džeňi andro kheľibnaskro kotor andro teatro, paľis geľas andro herecko u giľavibnaskro kotor. Bijo kheľiben andro teatroskre dramatizaciji kerel buťi the sar eksterno sikhavňi andro Privatno bašavibnaskro u dramaticko konzervatorijum andro Košice, kaj sikhavel terne hercen te khelel.
e kategorija: vizualno čitratuňipen
o tagi: sekularno digitalno esteticko fotografija Romathan savorenge interno
Roman Godla
kerdo: 07. 09. 2020 09:19 opre kerdo: 27. 11. 2020 01:47
Avri ile fotografiji sikhaven le solistas pal o Teatro Romathan Roman Godla. Kerel e činohra, khelel o šerutne the serakre charaktera andro inscenaciji vaš čhavore the vaš o bare manuša. Bi o kheľiben kerel buťi the andre kheľibnaskri sekcija andro teatro sar choreografos. Andro Teatro Romathan avľas andro berš 1994 jekhvarestar kana agorinďas o slugaďipen. Dži o berš 2002 sas o aktoris the giľavno.
e kategorija: vizualno čitratuňipen
o tagi: sekularno digitalno esteticko fotografija Roman Godla Romathan savorenge interno
Marián Balog
kerdo: 07. 09. 2020 09:06 opre kerdo: 27. 11. 2020 01:47
O fotografiji le teatrostar, kaj hino o solistas andal o Romathan Marián Balog, kerde andro dokumentačno the informačno centrum vaš e romaňi kultura andro berša 2013 dži o 2018.
Andro teatros hino le beršestar 1992. Le beršestar 2009 andro teatros bijo kheľiben kerel the e dramaturgija u režija. E teatroskri buťi prindžarlas imar anglo berš 1992, khelelas andro Teatros Jonaš Záborský andro Prešov. Bijo teatros kerelas the andro filmos. Andro berš 2000 sas jekh maškar o šerutne charaktera andro filmos (e produkcija: Čechiko, Slovaťiko, Francuziko) savo pes vičinlas Sar gele pro drom o študenta Peter u Jakub. Andro berš 1995 chudľas vaš peskri buťi o moľipen khatar e Asocijacija teatroskre manušengri pre Slovaťiko u the khatar o Slovaťiko literarno fondos.
Aver moľipena:
2006 – O literarno fondos – o moľipen vaš e bari umelecko u režijno kontribucija andre inscenacija E chochaďi fameľija.
2007 – O moľipen forostar Košice vaš e bari buťi savi kerďas kana pes phundravelas o teatros Romathan, but beršengri buťi andro teatros u vaš e talentovano režijno buťi, savi akana hiňi nekhbareder vaš o teatroskro repertoaris.
2016 – O literarno fondos – o beršeskro moľipen vaš e režija le originalno romaňi paramisakri bašavibnaha O magicko harangoro.
e kategorija: vizualno čitratuňipen
o tagi: sekularno digitalno esteticko in persona fotografija Marián Balog Romathan savorenge interno
Milan Godla
kerdo: 07. 09. 2020 08:54 opre kerdo: 27. 11. 2020 01:47
E selekcija kaj hine o fotografiji andal o kheľibena andre save khelelas o Milan Godla, o hercos, giľavno, translatoris, scenaristas u dramaturgos. Peskri karijera chudľas te kerel andro amatersko suboris, kaj sas o giľavne u o herci andro Prešov, e šerutňi sas e Daniela Hivešová Šilanová. Le beršestar 1992 sas andro Teatro Romathan. Andro teatro agorinďas andro berš 2017. Godla sas o integralno kotor andro teatros. Andro berš 2004 chudľas o moľipen khatar o primatoris andro foros Košice vaš o keribena andre kultura.
e kategorija: vizualno čitratuňipen
o tagi: sekularno digitalno esteticko in persona fotografija Romathan savorenge interno
Roman Goroľ
kerdo: 21. 08. 2020 15:43 opre kerdo: 27. 11. 2020 01:47
E portretovo fotografija pre savi hino o romano lekhavno Roman Goroľ. E fotografija sas kerďi 16. novembriste 2016 pal oda, so avri diňas leskri jekhto poeticko kňižka Šilalo čalavipen našade tosarastar, savi kerďas e Štatno džaňibnaskri kňižňica andro Prešov.
Roman Goroľ uľiľlas andro Vranov nad Topľou. Hin les e romňi u trin čhave. Sikhľolas pre Pedagogicko fakulta pre Prešovsko univerzita andro Prešov, kaj kerďas o bakalarsko študijum. Dži o berš 2019 kerelas buťi sar o sikhavnengro asistentos andre Zakladno škola andro gav Čaklov, kaj the bešel. Le beršestar 2019 chudľas te kerel buťi sar o redaktoris vaš o narodnostno programos andro Slovaťiko radijo andro Košice. Andro leskro jilo hiňi e literatura, poezija u proza. Mekh sar čhavoro chudľas te lekhavel charne giľutne pal o dživipen, emociji, pal o kamiben.
e kategorija: vizualno čitratuňipen
o tagi: sekularno digitalno esteticko fotografija Roman Goroľ savorenge interno
Karel Adam
kerdo: 28. 10. 2019 18:19 opre kerdo: 27. 11. 2020 01:47
Karel Adam, DiS.art, (1953-) hino o profesijonalno lavutaris − primašis, dirigentos, u kana sas o vakeriben kerdo, the o šerutno (1998-2016) andro profesijonalno romano teatro Romathan. Kana agorinďas o Themeskro konzervatorijum Kašate geľas te kerel andro agenturi Slovkoncert the Pragokoncert. Kana agorinelas o berš 1992 geľas te kerel andro nevo kerdo teatro Romathan sar o šefdirigentos andro teatroskro orchestros.
e kategorija: vizualno čitratuňipen
o tagi: sekularno digitalno esteticko in persona fotografija Karel Adam savorenge interno
Barbora Botošová
kerdo: 27. 06. 2019 15:13 opre kerdo: 27. 11. 2020 01:47
Andro objektos hine trin farebna fotografiji pre save hiňi e romaňi primaška e Barbora Botošova. O objektos kerďam andro Romano Inštitutos, Klariská 14, Braťislava, pro 6.2.2014, kana pes vakerelas pre tema pal o romano bašaviben.
e kategorija: čitratuňipen
o tagi: sekularno digitalno esteticko in persona fotografija Barbora Botošová savorenge interno
Cinka Panna - O leperibnaskro than
kerdo: 21. 06. 2019 10:49 opre kerdo: 27. 11. 2020 01:47
O fotografiji save dokumentinen o leperibnaskro than pre romaňi primaška Cinka Panna. O autoris hino o rezbaris, socharis the čitratuno Aladár Igó. O leperibnaskro than sas kerdo andro berš 1992 andro gav Gemer.
Cinka Panna - e legendarno Romaňi primaška, e lavutarka prindžarďi andro savoro Ungriko them, andro Polťiko the Rumuňija (varekaj pes pisinel Cinková Panna).
* 1711 - Gemer (okresis Rimavsko Sobota)
† 5. februaris 1772 - paruďi andro Gemer
e kategorija: čitratuňipen
o tagi: sekularno digitalno esteticko 3D artefakt skulptura Cinka Panna savorenge interno
Jozef Cichý
kerdo: 21. 06. 2019 10:41 opre kerdo: 27. 11. 2020 01:47
Jozef Cichý (1966-) hino o romano čitratuno andal o Nižný Žipov, okres Trebišov. Avri sikhľiľas automechanikos, paľis ča čitrinelas. Leskro čitratuňipen rodelas e inšpiracija nekh buter khatar o Salvador Dalí, Leonardo da Vinci, Michelangelo Buonarotti the Rafael Santi. Čitrinel nekh buter le akrylovo the olejovo farbenca, o čitre kerel nekh buter pro pochtan the sololit. Buter čitre lestar hine pro fali andro khangera vaj andro pharipnaskre khera. O temi andro leskre čitre hine bi o sakralna motivi the o temi pal e fameľija, o mariben the romipen. Andro 90. berša chudľas o moľipen vaš o leskro čitripen pre sa slovaťiko kompeticija maškar o amaterska čitratune andro Trenčín. Leskre čitre sas sikade jekhetane aver romane čitratunenca andro Polťiko, andro Muzeum vaš e romaňi kultura Brnoste, Braťislavate pro sikaviben O jileskre čalavipena pre romaňi paleta, Perješiste, andro Michalovce pro sikaviben Romane čercheňa, vaj andro Stropkov. Leskre čitre hine akana andro ki o 30 gavende andro lengre pharipnaskre khera, andro varesave khangera, andro Muzeum vaš e romaňi kultura Brnoste the andro aver thana pre Slovaťiko the andro aver thema.
e kategorija: čitratuňipen
o tagi: sekularno digitalno esteticko fotografija Jozef Cichý savorenge interno
