Romathan - Virtuozno čardašis
kerdo: 19. 05. 2017 16:12 opre kerdo: 27. 11. 2020 02:00
Romathan andro neve gada - o virtuozno čardašis: E 65. premijera andro teatros Romathan sas andro neve gada. O programos so kerďas o teatros sas e kombinacija maškar o bašaviben, kheľiben, giľavipen u individualna orchestralna bašavibena. Jekh maškar ola kotora hino the o bašaviben savi pes vičhinel "O virtuozno čardašis".
e kategorija: bašaviben
o tagi: Romathan
Romathan - Čapašis
kerdo: 19. 05. 2017 16:09 opre kerdo: 27. 11. 2020 02:00
Romathan andro neve gada - o čapašis: E 65. premijera andro teatro Romathan sas pal o bašaviben u kheľiben. E simbijoza sas maškar o bašavibnaskre the kheľibnaskre kotora pre premijera andre simbijoza, jekh avelas pal o aver. Adaj hino o čapašis sar les khelel o kheľibnaskro ansamblos andal o Romathan.
e kategorija: kheľiben
o tagi: Romathan
Romathan - Adagio
kerdo: 19. 05. 2017 16:07 opre kerdo: 27. 11. 2020 02:00
Adagio Romathan andro neve gada: O teatro Romathan sar peskri 65. premijera kerďas o bašavibnaskro the kheľibnaskro programos tel o nav Romathan andro neve gada, savo sikavel le manušenge šukar bašaviben the kheľiben. Jekh maškar o bašavibnaskre kotora andro programos hiňi the e giľi Adagio, savi giľavel Ondrej Ferko.
e kategorija: bašaviben
o tagi: Romathan
E džiďi kňižka: O Romano bašaviben pre Slovaťiko, Eugen Vizváry
kerdo: 19. 05. 2017 16:05 opre kerdo: 27. 11. 2020 02:00
O Džide biblioteki sar e metoda den le manušenge o šajipen te prindžarel o personalna dživipena le manušengre, save hine interesantna u le majoritakre dženenge aňi na prindžarde. O res hino pre jekh sera te vazdel e identita andre romaňi minorita, pre aver sera te sikavel la majoritake le Romen sar e minorita barvaľa kulturno tradicijaha. O dujto andale e serija kidipnaskri "O džide kňižki/pustika", save kerel o Themeskro džaňibnaskro pustikengro kher andro Prešov sas andro Wave Club andro Prešov, 22. junos 2015, e tema sas o romano bašaviben. O šerutno akhardo sas muzikakro producentos, o kompozitoris, klaviristas Eugen Vizváry, o prindžardo bašaldo pre Slovaťiko, kerel nekh buter o žanri: Jazz, Funky, Fusion, Rock, Pop, Hip-Hop, R&B, Country, Classic. O bašavibnaskre akharde sas e cimbalovo banda Ďusi Band andal o Prešov (Július Bandy phureder, Julius Bandy terneder, Peter Ferko, Kristián Bandy + Samko Bandy) u e giľavňi Žaneta Štipáková the e Vanessa Siváková.
e kategorija: vakeriben
Tiri paramisi
kerdo: 19. 05. 2017 16:02 opre kerdo: 27. 11. 2020 02:00
O projektos Lačho štart 2 (A Good Start 2) hino e inicijativa khatar e themutnengri asocijacija Vyrovnavanie šancí (Sajekh šajipena) le finančno žutipnaha khatar o Romano sikhľuvibnaskro fondos (Roma Education Fund - REF, Budapešť). Kerel pes le beršestar 2010 sar o pilotno projektos savo hino te zorarel u te vazdel o angleškolakro sikhľuviben maškar o čhavore andal o čorikane socijalna grupi andro lokaliti kaj bešen o Roma. Jekh maškar o trin slovaťika lokaliti hino o gav Zborov, kaj pen keren o aktiviti save lačharen o čhavorengro phiriben andro cikne školi, paľis o fameľijakro bararipen le čhavorengro, save pen na dochuden andre cikňi škola vaš o frima kapaciti u e aktivizacija le dadengri the dajengri, hoj pes te kerel lengro na formalno sikhaviben u bareder participacija pre kala procesi. E buťi le dajenca the dadenca hiňi the Tiri Paramisi (Your Story) savi mangel te lačharel o čhibakre džaňibena le dajengre, save pen kiden jekhetanes u genen u keren buťi le paramisenca.
e kategorija: vakeriben
E džiďi kňižka: Jozef Banyák
kerdo: 19. 05. 2017 15:59 opre kerdo: 27. 11. 2020 02:00
O džide kňižňici sar e metoda den le manušenge o šajipen te prindžarel o personalna dživipena le manušengre, save hine interesantna u le majoritno manušeske na but prindžarde. O res hino pre jekh sera te vazdel e identita andre romaňi minorita, pre aver sera, andre majorita te sikavel le Romen sar e minorita, sava hiňi barvaľi kulturno tradicija. Jekhto andal e serija kidipena "O džide kňižki 2015", savi kerďas e Themeskri džaňibnaskri kňižňica andro Prešov sas pro 20. aprilis 2015 andro Wave Klub andro Prešov. O akhardo manuš sas o filmovo režiseris the producentos Jozef Banyák. Vakerde leha Erika Godlová the e Zuzana Paľuchová. Te bašavel sas akharďi e grupa Gypsy Kings Revival.
e kategorija: vakeriben
Ondrej Ruszó - portret
kerdo: 19. 05. 2017 15:54 opre kerdo: 27. 11. 2020 02:00
Ondrej Ruszó hino o amatersko čitratuno, savo dživel u kerel buťi andro gav Plešivec. Uľiľas andre Revúca. Jekhetane le čitratuneha Tibol Oláh len hino lengro atelijeris. Te čitrinel chudľas imar kana sas cikno, pre zakladno škola. Sas les o berša, kana na čitrinelas. Phenel, hoj te le manušes hino o talentos, ela les sakovar, the te na čitrinela buter berša. Buter pal o čitratuňipen sikhľolas kana kerelas pro ačhavibena Bratislavate. Pal e buťi phirelas pro kurz. Jekhto buťa sikaďas andro Romano nevo ľil mekh andro jekhto eňavardešte berša. Kerelas o ilustraciji vaš e poezija. Nekh buter čitrinel o paťavibnaskre, religijozna temi, čitrinel o portreti, interesinel pes pal e architektura.
e kategorija: čitratuňipen
o tagi: Ondrej Ruszó
Viliam Sarközy - charťas
kerdo: 19. 05. 2017 15:50 opre kerdo: 27. 11. 2020 02:00
Viliam Sarközy hino andal e charťikaňi fameľija. O portretos sas kerdo, kana sas o kidipen tel o nav Europakro romano charťikano simpozijum, savo kerel e themutnengri asocijacija Charťikano. Andro portretos vakerel pal e charťikaňi tradicija andro gav the andre fameľija, no the pal oda, te odi vasteskri buťi dživela mekh buter berša.
e kategorija: vastengre buťa
Babula
kerdo: 18. 05. 2017 12:47 opre kerdo: 27. 11. 2020 02:00
O vakeriben pal e Emília Kissová, pal o sokaša the tradiciji, pal o averipena u špecifikane buťa maškar o vlachika Roma pre Slovaťiko. Andro šov kapitoli vakerel pal oda, so hin e fameľija, sar o manuša dživen jekhetanes, pal o sokaša pro mangavipen u bijav, pal o čhavore, sar oda hin te avel e daj, pal oda, sar pen den le čhavorenge aver nava u buťa, pal o tradiciji kana vareko merel u pro parušagos, pal o drabaripen the e romaňi čhib.
e kategorija: vakeriben
Romathan - E garuďi luma u o zarale
kerdo: 12. 05. 2017 18:06 opre kerdo: 27. 11. 2020 02:00
E premijera vaš o teatroskro kheľiben "E garuďi luma u o zarale" vaš o čhavore khelďas o Teatro Romathan. E inscenačno paramisi del le manušenge o dikhipen pre imaginativno luma andro vešeskro thagaripen, kaj e thagarňi hiňi e "Bachtaľori". Andre paramisi o cikno čhavoro arakhel, kaj pes garuvel o lačhipen the o kamiben maškar o bilačhipen the intrigi save pen ačhen the andre Garuďi luma, the andre manušengri luma. Žanros: o kheľiben le giľenca pro paramisakre motivi, e čhib andro kheľiben: primarno slovaťiko, romanes sekundarno, e scena: klasicko rekvizitarno, o kheľiben nane interaktivno, aľe performativno. Khelen: Karel Adam, Oto Bunda, Milan Godla, Marián Balog the aver džene.
e kategorija: e drama
o tagi: Romathan
