Džiďi kňižka holokaust Ďusi band Hatikva (e židoviko himna)
kerdo: 27. 11. 2023 13:26 opre kerdo: 10. 01. 2024 11:10
Hatikva, Ha-Tikva – e izraelsko štatoskri hymna. O lava hine pal o paťaben, hoj o Židi avena pale andro lengro them u kamen odoj te dživel smirom, andro kamiben the harmonija (hatikva = hebr. o paťaben). O lava pisinďas andro berš 1878 Naftali Herz Imber (*1856, †1909) sar e giľutňiu andro 1886 la diňas avri tel o nav Tikvatenu (Amaro paťaben). E melodija kerďas o kompozeris Samueal Cohen, o imigrantos andal o Moldavsko, sar e popularno folklorno moldavsko-rumuňikaňi melodija, andre late the o melodiji u motivi andal e Vltava andal o ciklos Miro them (Bedřich Smetana). Pro 7. sionisticko kongresos andro Bazilej (1905) sas imar but prindžarďi u lakro statusos sar e hymna vaš o sionisticko keriben sas zorardo pro 18. kongresos Prahate (1933). Le beršestar 1948 hiňi e štatno hymna. Andre varesave komuniti pes giľavel sar e paluňi giľi andre khangeri vaj pal o chaben.
O video anel lakri inštrumentalno interpretacija khatar e romaňi cimbalovo kapela Ďusi Band.
Andre fameľijakri kapela le naveha Ďusi Band bašaven o Július Bandy phureder, u leskre trin čhave Kristián, Július u nekterneder Samuel. E cimbalovo kapela Perješistar prezentinel e nekfeder tradicija pal o romane cimbalova kapeli prekal o baro interpretačno džaňiben so hin le dženen the prekal o lengro buchlo u pro žanri barvalo repertoaris. Odoj arakhas o folkloris tipicko vaš o Roma no the oda slovaťiko u aver nacijengro the minoritengro, e kapela bašavel the e klasicko muzika u nanašavel pes aňi andro žanra sar hine o džez, pop vaj o filmova melodiji. E romaňi giľi Hatikva, lakri inštrumentalno verzija sas bašaďi u dokumentimen pro kidipen Džiďi kňižka pal e tema Holokaust, andro Prešov, 27.9.2018.
Ko pre soste bašavel
E lavuta (o primašis) – Samuel Bandy
E bari bugova – Július Bandy terneder
E brača (e viola) – Kristián Bandy
E cimbalma – Július Bandy phureder
kerdo: 27. 09. 2018
e kategorija: bašaviben
o tagi: inštrumentalno moderno folklorno quartet averestar Ďusi Band sakoneske interno
