E bengaľi lavuta the o akharde džene
kerdo: 08. 10. 2018 15:49 opre kerdo: 27. 11. 2020 02:00
O ekstra koncertos kerďas o orchestros E bengaľi lavuta the lengre akharde džene kaj penge te leperen pro Ján Berky Mrenica phureder (11.5.1939, Očová - † 12.10.2008) the leskre na dodžide 75 berša Bratislavate, 18.11.2014. Ján Berky Mrenica phureder sas o lavutaris a kerelas o kompoziciji. Kerďas o orchestros E bengaľi lavuta, kaj e prima pal oda, so ov muľas, iľas leskro čhavo Ján Berky Mrenica terneder. O khetaňiben les prindžarelas prekal oda, hoj reprezentinelas o slovaťiko folklorno bašaviben a sas o šerutno andro orchestros SĽUK (O Slovaťiko folklorno džaňibnaskro kolektivos), kerelas the but televizna bašavibnaskre programi. Kidelas opre the o romane giľa, save andro berš 1993 diňas avri andre kňižka tel o nav Nane oda lavutaris. Andre peskri bašavibnaskri kreativno buťi kerelas jekhetanes buter slovaťika giľavnenca (Martin Babjak, Jana Kocianová the aver) the bašalde dženenca. Vaš o leskre bare buťa andre kultura pre Slovakija chudľa o moľipena: 1995 - O Slovaťiko bičhado, 1997 - O Pribinoskro trušul, 1997- Slovak Gold, 2003 - E krištaľovo phak vaš o berš 2002, 2003 - O moľipen le forostar Zvolen vaš o savori dživipnaskri buťi, 2004 - O paťivalo moľipen vaš e dekada Slovak Gold, 2006 - O moľipen andal o Banskobystricko peskro rajipnaskro regijonos, Somnakuno CD vaš o albumu O primašoskro suno, savestar bikenďas buter sar 5 000 kotora. Te del paťiv ole lavutareske, vaš oda sas o koncertos savo ľidžalas o Ján Berky terneder the E bengaľi lavuta, maškar o akharde džene sas e Jana Hubinská, Jana Orlická, Marián Čekovský, Martin Valihora, Milan Godla, Ondrej Ferko the aver. O video anel lengro bašaviben the giľavipen.
copyright: O Themeskro džaňibnaskro pustikengro kher andro Prešov
kerdo: 18. 11. 2014
e kategorija: bašaviben
