Jozef Cichý - O portretos Jaroslav Cickoskro
kerdo: 04. 04. 2022 09:01 opre kerdo: 04. 04. 2022 09:03
O maľimen čitro pro glejimen kašt baro 51 cm x 71 cm, portretinel le romane rezbaris Jaroslav Cicko. O autoris savo čitrinďas o čitro hino Jozef Cichý. O čitro sas andre kolekcija andre organizacija Jekhetane-Spolu kaj denas o phiko le romane čitratunenge. O čitro sas kerdo andro berš 2001, kanastar sas pro buter sikhavibena, save e organizacija kerelas. Maškar o nekhbuter prindžarde phirel o sikhaviben savo pes vičinela Čitrinas perdal o kamiben, o kotor andre Romaňi phirďi galerija. Jozef Cichý (1966-) hino o romano čitratuno andal o Nižný Žipov, okres Trebišov. Avri sikhľiľas automechanikos, paľis ča čitrinelas. Leskro čitratuňipen rodelas e inšpiracija nekh buter khatar o Salvador Dalí, Leonardo da Vinci, Michelangelo Buonarotti the Rafael Santi. Čitrinel nekh buter le akrylovo the olejovo farbenca, o čitre kerel nekh buter pro pochtan the sololit. Buter čitre lestar hine pro fali andro khangera vaj andro pharipnaskre khera. O temi andro leskre čitre hine bi o sakralna motivi the o temi pal e fameľija, o mariben the romipen. Andro 90. berša chudľas o moľipen vaš o leskro čitripen pre sa slovaťiko kompeticija maškar o amaterska čitratune andro Trenčín. Leskre čitre sas sikade jekhetane aver romane čitratunenca andro Polťiko, andro Muzeum vaš e romaňi kultura Brnoste, Braťislavate pro sikaviben O jileskre čalavipena pre romaňi paleta, Perješiste, andro Michalovce pro sikaviben Romane čercheňa, vaj andro Stropkov. Leskre čitre hine akana andro ki o 30 gavende andro lengre pharipnaskre khera, andro varesave khangera, andro Muzeum vaš e romaňi kultura Brnoste the andro aver thana pre Slovaťiko the andro aver thema.
Jaroslav Cicko hino o prindžardo romano čitratuno, kerel the o plastiki, save kerel nekhbuter kaštestar, no the barestar.
Uľiľas 25.3.1939 andro Martin u muľas 18.11.2010 andre Horná Štubňa andro okres Turčianske Teplice.
Andre Fabrika vaš o phare mašini andro Martin kerelas buťi sar inštrumentaris, andro martinsko Štúdio vaš o naprofesijonalna čitratune kerelas peskre buťa kaštestar. Sas o lektoris pro simpoziji vaš o naprofesijonalna čitratune.
Andro berš 2000 sikhavelas peskre buťa u save buter dromenca len kerel andro Ňemciko, Čechiko, Španielsko, Francuziko u Talianiko.
Nekhbuter sas leskro motivos e džuvľi andro savore lakre formi.
o autoris: Jozef Cichý
copyright: O Themeskro džaňibnaskro pustikengro kher andro Prešov
kerdo: 22. 02. 2022
e kategorija: čitratuňipen
o tagi: sekularno materialno esteticko 2D artefakt čitro Jozef Cichý Jaroslav Cicko savorenge interno
