Jozef Ravasz József
kerdo: 19. 02. 2024 15:05 opre kerdo: 19. 02. 2024 15:07
E Šarlota Bottová hiňi e absolventka andal e Maškarutňi profesijakri škola andre Rimavsko Sobota, e kozmetička. O čitratuňipen chudľas te kerel imar kana phirelas pre maškarutňi škola, kaj sikhaven the e estetika. Pro ori pal e estetika sikhľiľas pal o portreta u sar len te kerel, paľis dureder sikhľolas korkori, prekal o informaciji save sas vaj pro internet, vaj andro džande kňižki. Lakri nekpašeder technika hin o grafitovo penkalos. Andro berš 2020 chudľas te kerel the le farbenca u dureder čitrinel o portreta.Andro berš 2020 chudľas o štipendijum andal o Fondos vaš o pomožipen andre minoritengri kultura SR, kaj te kerel e kolekcija čitre - o portreta le romane lekhavnengre.
Pro portretos hino o lekhavno Jozef Ravasz József.
Jozef Ravasz József uľiľlas 23. novembriste 1949 andro Sokolce, okresis Dunajsko Streda pre Slovaťiko. Phirelas pro gimnazijum, kaj pes sikhavelas ungrika andre Dunajsko Streda. Andro romane osadi kerďas but konkretna politicka the kulturna organizaciji. Lekhaďas buter kňižki the poeticka kolekciji. Maškar lende the e kňižka Domček v srdci (Jileskro kheroro, 1992), savi diňas avri o publikačno kher Romaňi Kultura Bratislavate. Andre kňižka hine o paramisa lekhade ungrika, romanes the slovaťika.
Hino o docentos, romologos, socijalno buťarno. Agorinďas e Fakulta vaš o socijalna džaňibena pre Univerzita Konštantinos Filozofos Nitrate, paľis kerďas o rigorozno ekzamenos. Andro doktorandsko sikhľuviben geľas dureder pre Uči škola sunto Alžbeta Bratislavate. Andro berš 2012 kerďas e habilitacija u chudľas o titulos sar docentos. Akana bešel u kerel buťi andre Dunajsko Streda the Moldava upral e Bodva, sajekh hino o šerutno andro Romologicko rodipnaskro u metodicko inštitutos andre Dunajsko Streda.
Khatar:
szmit.hu/rolunk/tagjaink/ravasz-jozsef/
kerdo: 25. 10. 2023
e kategorija: čitratuňipen
o tagi: sekularno materialno esteticko 2D artefakt čitro Šarlota Bottová savorenge interno
