Koncentračno taboris
kerdo: 06. 09. 2022 13:13 opre kerdo: 06. 09. 2022 13:14
O autoris le čitroskro hino o čitratuno Jozef Fečo. O čitro hino andal e kolekcija 11 čitrengri pal e tema romano holokaust. O autoris arakhľas e inšpiracija andro lekhavipen khatar e Elena Lacková O mule na aven pale. E o čitre andre kolekcija kerďas prekal o štipendijum andal o Fondos vaš e minoritengri kultura SR.
O autoris del the e deskricipcija kijo čitro, o kotor andal o lekhavipen:
„Kana arakhle, hoj o Jenkus hino koro, cirdle lestar tele o gada u čhide les andre avka vičinďi kupeľňa. Jekhetanes leha bičhade andre averen, džuvľen, muršen, the čhavoren. Ajci dženen, hoj le Jenkus nasas kaj te džal dureder. Ole manušen šunelas paš peste, daralas, o čhavore chudle te rovel.
Jekhvarestar savoro ačhiľas čit. O vudar pes phandľas andre. Andal e fala opral lende nachudľas te čuľol o paňi, o esesaka mukhle o gasos. Pal o nabut pes andral šunelas ča o paluno roviben le manušendar, save tasľonas, mangenas o pomožipen, marenas pro vudar. O Jenkus dži paluno momentos rovindo vičinelas: Šariko miri, kaj sal, phen mange! No leskro vičiňiben u roviben leske andro kirlo tasaďas o gasos.
Kana savoro andro kher ačhiľas bihangoskro, o murdaripnaskro komandos phundraďas o vudar, mukhľas avri o gasos u aver džene avle te lel murdarde dženen andro krematorijum.“
Jozef Fečo hino o absolventos andal e Maškarutňi džaňibnaskri škola Perješiste, o dizajn u džaňibnaskri buťi le kašteha. Nekbuter pes interesinel pal o manušikane muja u lengri mimika, so kamen oleha te phenel, so hino lengro tipicko. Vaš o Themeskro džaňibnaskro pustikengro kher Perješiste čitrinďas maškar o berša 2015 dži o 2019 o seriji 23 bare formatengre čitre vičinde O naprindžarde farbi le manušengre.
copyright: O Themeskro džaňibnaskro pustikengro kher andro Prešov
kerdo: 19. 07. 2022
e kategorija: čitratuňipen
o tagi: sekularno materialno esteticko 2D artefakt čitro Jozef Fečo savorenge interno
