O veš
kerdo: 06. 09. 2022 13:51 opre kerdo: 06. 09. 2022 13:51
O autoris le čitroskro hino o čitratuno Jozef Fečo. O čitro hino andal e kolekcija 11 čitrengri pal e tema romano holokaust. O autoris arakhľas e inšpiracija andro lekhavipen khatar e Elena Lacková O mule na aven pale. E o čitre andre kolekcija kerďas prekal o štipendijum andal o Fondos vaš e minoritengri kultura SR.
O autoris del the e deskricipcija kijo čitro, o kotor andal o lekhavipen:
Tosara pen phundraďas o vudar u maškar terďolas o šinguno, o pindre pro duj seri, andro vas o krompačis. Bange mujeha vičinel:
„Ušťen opre, khandipena! Opre!“ Paľis mek banďiľas o muj so džungľiľas u čhungarďas: „Na ajso khandipen adaj kerďan, džukle. Savore avri, anglo barakos. Achaľon? Melale rikone!“
The andal o aver baraka avenas avri o murša. Le Lajkuske zorales marelas o jilo. Nadžanelas so te užarel, dikhelas paš peste. Avľas anglal lende o šerutno pre staňica u phenďas: „O zakonos phenel, hoj san phandle. San bičhade pro buťa te keren. Ačhavena o trastuno drom Prešov – Strážske. Kada drom but kampel la ňemciko armadake, kaj te resen peskro andro mariben! Te vareko tumendar phagerela e buťakri disciplina, vaj kamela te denašel sar šošoj, džala anglo kris. U paťan, hin amen zor te keras tumenge čačo bibacht. Ajso hino o slovaťiko zakonos! Savo te nadodoľikerel oda hin sar pes korkores te murdarel.“
Jozef Fečo hino o absolventos andal e Maškarutňi džaňibnaskri škola Perješiste, o dizajn u džaňibnaskri buťi le kašteha. Nekbuter pes interesinel pal o manušikane muja u lengri mimika, so kamen oleha te phenel, so hino lengro tipicko. Vaš o Themeskro džaňibnaskro pustikengro kher Perješiste čitrinďas maškar o berša 2015 dži o 2019 o seriji 23 bare formatengre čitre vičinde O naprindžarde farbi le manušengre.
copyright: O Themeskro džaňibnaskro pustikengro kher andro Prešov
kerdo: 19. 07. 2022
e kategorija: čitratuňipen
o tagi: sekularno materialno esteticko 2D artefakt čitro Jozef Fečo savorenge interno
