Ľudovít Didi
kerdo: 19. 02. 2024 11:52 opre kerdo: 23. 02. 2024 07:43
E Šarlota Bottová hiňi e absolventka andal e Maškarutňi profesijakri škola andre Rimavsko Sobota, e kozmetička. O čitratuňipen chudľas te kerel imar kana phirelas pre maškarutňi škola, kaj sikhaven the e estetika. Pro ori pal e estetika sikhľiľas pal o portreta u sar len te kerel, paľis dureder sikhľolas korkori, prekal o informaciji save sas vaj pro internet, vaj andro džande kňižki. Lakri nekpašeder technika hin o grafitovo penkalos. Andro berš 2020 chudľas te kerel the le farbenca u dureder čitrinel o portreta.
Andro berš 2020 chudľas o štipendijum andal o Fondos vaš o pomožipen andre minoritengri kultura SR, kaj te kerel e kolekcija čitre - o portreta le romane lekhavnengre.
Pro portretos hino o lekhavno Ľudovít Didi.
Ľudovít Didi uľiľas andro berš 1931 andro Púchov. Andro školakro berš 1951/1952 chudľas te sikhľol andre škola vaš o politicka u chulajipnaskre džaňibena Prahate, bijal leskre originalna gindipena len andal o študijum avri čhide. Andro berš 1963 agorinďas o študijum pro Pedagogicko inštitutos Nitrate. Andro berš 1980 podpisinďas e Charta 77. O Okresno narodno viboris les paľis andro berš 1990 rehabilitinďas, paľis sas o šerutno andro Čhavorikano kher andro Koliňany. E literarno aktivita chudľas te kerel andro berš 2001. O jekhto lekhaviben, o romanos O vakeribena senteľimen balvajaha, diňas avri kana les sas imar eftavardeš the trin berša, andro berš 2004. Andro berš 2008 avľas avri leskro aver literarno lekhavipen Cigánkina veštba (O romňakro drabaripen). O romanos Kalo Rom u parno kamiben (2012), pal o dživipnaskre peripetiji so hin le protagonistas, o romano čhavo Gejzas, savo kamel e rakľa Marika, hino o vakeriben zoraleder khuďa kompozicijaha. Leskro paluno romanos autobijograficko elementenca, O Rom Tardek u leskro dživipen, avľas avri imar kana o autoris muľas (2013).
Khatar o foros Vráble chudľas o Ľudovít Didi o Moľipen le foroskro Vráble 2014, In memoriam, u andro berš 2023 leske andro foros kerde e leperibnaskri tabla. E prezidentka Zuzana Čaputová leske diňas andro berš 2023 o Rados Ľudovítoskro Štúroskro III. učipen, In memoriam, vaš e bari buťi prekal e demokracija u lakro vazdipen, o manušikane čačipena u slobodi.
Khatar:
www.litcentrum.sk/autor/ludovit-didi
www.spolok-slovenskych-spisovatelov.sk/products/didi-ludovit/
kerdo: 25. 10. 2023
e kategorija: čitratuňipen
o tagi: sekularno materialno esteticko 2D artefakt čitro Šarlota Bottová savorenge interno
