Murdaripen
kerdo: 06. 09. 2022 13:33 opre kerdo: 06. 09. 2022 13:37
O autoris le čitroskro hino o čitratuno Jozef Fečo. O čitro hino andal e kolekcija 11 čitrengri pal e tema romano holokaust. O autoris arakhľas e inšpiracija andro lekhavipen khatar e Elena Lacková O mule na aven pale. E o čitre andre kolekcija kerďas prekal o štipendijum andal o Fondos vaš e minoritengri kultura SR.
O autoris del the e deskricipcija kijo čitro, o kotor andal o lekhavipen:
„O esesaka ča asanas u vičinenas: Banditen! Partisanen! Chudle sakones, ko denašľas andal o than. Jekh džene tradle le Romen andro khera, aver džene čhorenas o khera le benzinoha u savore serendar labarde e osada. Jaj, bida, bari bida!
O Feris vičinelas: Soske te meras sar guruvňa? Se amen sam manuša! Tumen le Devlestar nadaran?! Ajci dživipena te lel?! O khera chudle te labol zorales. Andral pes šunenas o manuša sar vičine u roven. O murša marenas pro vudara, ispidenas pen paš o cikne blakici u mangenas hoj len te mukhen. Zijan.
Kana o thuv chudľas te khandel sar labardo mas u kokala, varesave gardistenge pen visaľile o ďombri. Čhandenas. O esesakengro šerutno vičinelas: Avka murdarava savore telune u degradimen rasi. Amen, o Ňemci, labarďam e jag te žužarel e luma ola meľatar!“
Jozef Fečo hino o absolventos andal e Maškarutňi džaňibnaskri škola Perješiste, o dizajn u džaňibnaskri buťi le kašteha. Nekbuter pes interesinel pal o manušikane muja u lengri mimika, so kamen oleha te phenel, so hino lengro tipicko. Vaš o Themeskro džaňibnaskro pustikengro kher Perješiste čitrinďas maškar o berša 2015 dži o 2019 o seriji 23 bare formatengre čitre vičinde O naprindžarde farbi le manušengre.
copyright: O Themeskro džaňibnaskro pustikengro kher andro Prešov
kerdo: 19. 07. 2022
e kategorija: čitratuňipen
o tagi: sekularno materialno esteticko 2D artefakt čitro Jozef Fečo savorenge interno
