Tera Fabianová
kerdo: 20. 02. 2024 10:13 opre kerdo: 20. 02. 2024 10:14
E Šarlota Bottová hiňi e absolventka andal e Maškarutňi profesijakri škola andre Rimavsko Sobota, e kozmetička. O čitratuňipen chudľas te kerel imar kana phirelas pre maškarutňi škola, kaj sikhaven the e estetika. Pro ori pal e estetika sikhľiľas pal o portreta u sar len te kerel, paľis dureder sikhľolas korkori, prekal o informaciji save sas vaj pro internet, vaj andro džande kňižki. Lakri nekpašeder technika hin o grafitovo penkalos. Andro berš 2020 chudľas te kerel the le farbenca u dureder čitrinel o portreta.
Andro berš 2020 chudľas o štipendijum andal o Fondos vaš o pomožipen andre minoritengri kultura SR, kaj te kerel e kolekcija čitre - o portreta le romane lekhavnengre.
Pro portretos hiňi e lekhavňi Tera Fabianová.
Tera Fabianová (angomis Kurinová) uľiľas 15.10.1930 Žiharcoste pre Slovaťiko. Phirel maškar o nekfeder romane lekhavne u poetki andro 20. šelberšipen. Hiňi e džeňi andre phureder generacija romane lekhavnengri, save pisinenas romanes. Tranda the pandž berš kerelas buťi pro žerijavos Prahate. Vakerelas bijo problemos štare čhibenca. Lakro literarno talentos arakhľas e čechiko romistka Milena Hübschmannovo, savi la cirdľas kijo lekhaviben andre romaňi čhib. Lakro debutos sas o charne lekhavipena andro magazinos Romano ľil andro 60. berša 20. šelberšipnaskre. Lakri kňižka Čavargošis/Tulák (1991) phirel andro fantasy žanros. Kadi publikacija ačhiľas but prindžarďi maškar o manuša pro Čechi. Vaš o Čechiko radijo la genďas o Vlastimil Brodský. O nekučeder than andre lakri buťi ľikerel e autobijografija Sar me phiravas andre škola (1992). Andro berš 2006 chudľas o Literarno moľipen Milena Hübschmannovakro vaš e dživipnaskri buťi. Muľas 23.3.2007 Prahate.
Zdroje informácií:
www.svedectviromu.cz/svedectvi/tera-fabianova
www.romarchive.eu/en/collection/p/tera-fabianova/
kerdo: 25. 10. 2023
e kategorija: čitratuňipen
o tagi: sekularno materialno esteticko 2D artefakt čitro Šarlota Bottová savorenge interno
