Milan Berky
kerdo: 03. 09. 2025 06:48 opre kerdo: 03. 09. 2025 06:49
Milan Berky (1961-) hino Lučencostar a bareder kotor dživipen kerelas buťi pro trastuno drom sar o vozmajstros. Ki e buter intenzivno artikaňi buťi pes dochudľas imar kana našaďas o buťaktro than, pal o 35 berša. Kada paruvipen andro dživipen leske diňas o than te buchľarel peskro kamiben kanastar sas cikno - o čitripen. Leskre čitra hine nekbuter o portreta, save kerel ekstremno detailenca the but realistikanes. Čitrinel nekbuter le angaroreha, saveha doresel o kontrastos the pherďaripen andro parne-kale buťa, save diťhon sar o fotografiji. Maškar leskre buťa phiren o portreta kaj hine o prindžarde manuša, no the o portreta le sako ďivesutne manušengre, kaj hine o Roma the o Romňa andal o kulturno the khetaňibnaskro the športovo dživipen. Milan Berky chudľas o rešpektos na ča pre Slovaťiko, no the avri, the te les nane o formalno artikano sikhľuviben. Chudľas buter moľipena, maškar lende o jekhto than andre kategorija portreta pro maškarthemutno baro marketos vaš o čitratune artikaňibena andro České Budějovice (2017) the o moľipen Inspirace vaš oda, so anďas andre kultura (2022). Leskro čitro - o portretos kaj hino o štatňikos andal o Irak - thode andro berš 2023 pre poštovo znamka andro Irak. O vakeriben le insitno čitratuneha pal o leskro dživipen the buťi sas kerdo 12.4.2024 andro Prešov.
kerdo: 12. 04. 2024
e kategorija: vakeriben
o tagi: leperiben biograficko monolog moderovano slovaťiko Milan Berky sakoneske interno
