Ondrej Gadžor - O plastiki
kerdo: 10. 09. 2021 10:56 opre kerdo: 10. 09. 2021 11:00
O videos pal e vistava, kaj sas sikhade o rezbarska buťa save kerelas o baro romano rezbaris u socharis Ondrej Gadžor. E vistava sas 25.4.2014 sar o leperiben pro Ondrej Gadžor, savo andro berš 2013 muľas. Varesave buťa pre vistava diňas o Muzeum Vojtech Loffleroskro andro Košice.
Ondrej Gadžor (9.7.1956-19.10.2013) - uľiľlas andre Krásna nad Hornádom, kaj chudľas te čhingerel imar kana sas 24 beršengro. Kerelas buťi butere materijalneca - le bareha, the le šingenca, mušľenca, nekh buter le kašteha. Opre vazdľas peskro unikatno plastikengro štilos, kaj but sikhľiľas khatar o akademicko socharis Vojtech Löffler, andro leskro buťakro kher kerelas buťi dešujekh berša. O subtilno charakteros khatar o cikne buťa cirdel the andro monumentalna bare buťa, save kerelas andro plenera. Leskri buťi prastal dur khatar e normalno produkcija so keren o na sikhade sochara. O charňipen the abstrakcija hiňi buchleder sar andre normalno nipengre buťa u e finalno forma hiňi varekaj maškar o moderno socharstvo u africka nipengre cikne soški. Leskre buťa sar te našaven o pharipen u diťhon lokhe. leskri zor hin andre žuže liniji u kheľiben le kašteha u leskre čitroha, savi andro peskre buťa rafinovanes thovel. Jekh maškar o nekh bareder temi hiňi e džuvľi. Sas les buter individualno ekshibiciji, regulerno phirelas pro socharska plenera. Sikaďas pes pro buter individualna ekshibiciji pre Slovaťiko the andro aver thema. Leskre buťa, bi o aver thana, hine sikade andro Los Angeles, vaj andro Vatikan u but lendar hine andro muzealna fondi pre Slovaťiko, vaj andro Čechiko (Vichodoslovaťiko muzeum andro Košice, SNM - Muzeum vaš e romaňi kultura pre Slovaťiko andro Martina, Muzeum vaš o Vojtech Löffler andro Košice, Muzeum vaš e romaňi kultura andro Brno).
copyright: Štátna vedecká knižnica v Prešove
kerdo: 25. 04. 2014
e kategorija: vastengre buťa
o tagi: džide tradična artistikano kašta čhiňiben Ondrej Gadžor sakoneske interno