E džiďi kňižka – Gitana – Adriana Drafiová
kerdo: 12. 04. 2024 09:11 opre kerdo: 12. 04. 2024 09:12
O formatos "E džiďi kňižka" sikhavel la prindžarďa romaňa giľavňa Adriana Drafiovo, savi giľavel tel o nav Gitana. O video sas kerdo andro novembros 2021 u sas andre televizija RTVS sar e ekskluzivno premijera. E dramaturgija prezentinel e Gitana sar e džiďi kňižka, savi amenge vakerel pal lakro dživipen la muzikaha, the pal o bašaviben sar pal e fameľijakri tradicija. Andro video giľavel o tradična romane u ungrika giľa, bašavel lake e fameľijakri cimbalovo kapela Ďusi Band Perješistar.
Baro talentos pro bašaviben chudľas le dadestar the le papustar, soduj džene sas prindžarde romane lavutara. Lakri inšpiracija sas o giľavne sar Whitney Houston, Mariah Carey, vaj e Barbra Streisand. Sar dešueftaberšengri chudľas o jekhto šajipen te giľavel avri. Jekhto sas o Švajčiarsko, paľis, sar e giľavňi, geľas prekal o baro kotor Europa. Giľavelas the anglo celebriti prindžarde andre luma, sar e Tina Turner, Claudia Schiffer, David Copperfield, vaj Boris Becker. Andro Ungriko giľavelas le prindžarde giľavneha Jozefoha Szaboha u paľis chudľas lakri but beršengri buťi la kapelaha Kmeťoband.
Imar paľis chudľas te kerel o nevo štilos - elektro swing u gypsy swing, andre soste lake pomožinel lakro muzikakro producentos Slavo Solovič. Maškar lakre aver muzikakre doresipena hin e titulno giľi andre slovaťiko čhib kije animovano paramisi Láva andal e produkcija andal o filmovo študijo Disney. E giľi hiňi o duet le giľavneha andal e kapela Korben Dallas, le Juraj Benetinoha.
Giľavel solo, vaj la kapelaha.
O video sas kerdo 19.11.2021 andro Prešov andro Centrum vaš e slobodno kultura Wave pre Hlavno uľica. Adriana Dráfiová- giľavel, Július Bandy - e cimbalma, Samuel Bandy - e lavuta, Roland Horváth - klarinet, saksofon, Kristián Bandy - e viola, Július Bandy terneder - bari bugova, o lava - Eduard Čonka.
copyright: O Themeskro džaňibnaskro pustikengro kher andro Prešov
kerdo: 19. 11. 2021
e kategorija: vakeriben
o tagi: leperiben biograficko monolog moderovano slovaťiko Adriana Drafiová Gitana sakoneske interno
