Ján Šándor - khere
kerdo: 01. 02. 2023 13:12 opre kerdo: 01. 02. 2023 13:13
E archivno fotografija khatar e organizacija Jekhetane-Spolu, savi sikhavel le romane lekhavnes Ján Šándor andal e Prievidza.
O autoris la fotografijakro hino Jozef Ferenc, o fotografiji sas kerde andro kher, kaj o lekhavno bešelas, kana ke leste avľas e Daniela Hivešová-Šilanová, andro berš 1998. O datumos, kana sas kerďi e fotografija nane thodo pro filmos.
Uľiľas andro berš 1948 andro Brno (puraňi Čechoslovakia, akana Čechiko republika). Peskre 16 beršendar dži kana namuľas bešelas andre Prievidza. Savoro dživipen sas buťarno.
Leskre lekhavipena sas le beršestar 1979 andro magazina Železničiar, Bosorka, Smer dnes, Prieboj, Romano nevo ľil, Sam adaj, Romano džaniben. Leskro kňižno debutos sas o paramisa the o charne lekhavibena tel o nav Romano suno (2004). Andro berš 2008 e asocijacija Jekhetane-Spolu diňas avri e kňižka paramisenca savi pes vičinelas Kaľi ruža, slovaťika the romanes. Jekhetanes diňas avri 10 kňižki.
Sas o dženo andro Slovaťiko lekhavnengri asocijacija.
Andro berš 2017 leske In memoriam dine o moľipen Roma Spirit vaš o savoro dživipnaskro literarno keriben u vazdipen la romaňa kulturakro.
e kategorija: čitratuňipen
o tagi: sekularno digitalno esteticko in persona fotografija Ján Šándor savorenge interno
Ivan Berky Dušík
kerdo: 19. 01. 2023 11:51 opre kerdo: 08. 02. 2024 11:30
E fotografija andal o archivos OZ Jekhetane-Spolu, savi sikhavel le čitratunes u rezbaris Ivan Berky Dušík.
O than, o datumos u autoris la fotografijakro nane paš o analogovo filmos pisimen. Olestar so sikhaven o fotografiji pro filmos šaj phenas, hoj sas kerde andro berš 1998. O fotografiji sikhaven e buťi savi kerel o Ivan Berky Dušík andro leskro buťakro kher, kana čhinel e kaštuňi plastika.
Ivan Berky Dušík hino andal e Zvolensko Slatina, kaj bešel u kerel e buťi. Leskri artikaňi buťi hiňi pro gavutno kher andro leskro gav. Andro Romano nevo ľil buter berša delas peskre čitre.
Andro berš 2003 avri khelďas e kompeticija andro Muzeum vaš e romaňi kultura andro Brno, paľis kerďas o kaštune plastiki savenge diňas o nav Pieta (O pharipen), save hine o permanentno kotor andro muzeum andre ekspozicija pre tema holokaust. Leskri bari inšpiracija sas o prindžardo slovaťiko socharis Ján Kulich, savo uľiľas andre Zvolensko Slatina. Ivan Berky Dušík pes but interesinel pal e sakralno tema, no kerel the o kaštune plastiki pal o dživipen le Romengro.
e kategorija: čitratuňipen
o tagi: sekularno digitalno esteticko in persona fotografija Ivan Berky Dušík savorenge interno
Vincent Danihel
kerdo: 17. 01. 2023 14:43 opre kerdo: 08. 02. 2024 11:28
E archivno fotografija andal e organizacija Jekhetane-Spolu sikhavel le Vincent Danihel, savo ačhiľas prindžardo kana sas andre funkcija sar o zorardo manuš rajipnastar SR vaš o lačharipen le problemengro andre romaňi minorita, savi kerelas andro berša 1991 – 2000.
O than, o datumos u o autoris la fotografijakro paš o analogovo filmos nane pisimen. Prekal oda, so hino pro fotografiji pes šaj gondoľinel, hoj sas kerde andro berš 1998, vaš oda, hoj pro fotografiji hino the o jekhto romano šerutno andro foroskro kotor Luník IX andro Košice.
JUDr. Vincent Danihel uľiľas andro gav Kuklov andro okresis Malacky andre bareder romaňi fameľija. O pravňicko sikhaviben chudľas pre Pravňicko fakulta pre Komensko Univerzita Bratislavate. Andro berš 1990 sas o šerutno redaktoris andro jekhto romano magazinos andre puraňi Čechoslovakija savo pes vičinelas Lačho lav, paľis pes paruďas pro Amaro lav.
Andro berša 1990 – 1992 sas o poslancos andro Federalno kidipen Čechiko the Slovaťiko Federativno Republika (ČSFR), o kotor Manušengro kidipen. Sas o kandidatos vaš e politikaňi sera Komunisticko sera Slovaťiko (KSS), paľis vaš e Sera demokraticko bangi (SDĽ).
e kategorija: čitratuňipen
o tagi: sekularno digitalno esteticko in persona fotografija Vincent Danihel savorenge interno
Zoran Dimov
kerdo: 17. 01. 2023 10:36 opre kerdo: 08. 02. 2024 11:20
E fotografija andal o archivos andre organizacija Jekhetane-Spolu, savi sikhavel le Zoran Dimov, o manuš savo kerďas e privatno romaňi televizija, pro 5. Kongresos Maškarthemutňi romaňi unija (IRU), savi sas maškar o 24. u 28. julos 2000 Prahate.
Pre fotografija hino jekhetanes aver dženenca save sas pro Kongresos.
Zoran Dimov kerďas andro berš 1993 o jekhto privatno romano radijo u televizija RTV BTR National. Andro akanutne berša hino o šerutno andre Maškarthemutňi romaňi unija (IRU). Uľiľas andro berš 1965 andro Skopje, Opruňi Macedonija.
e kategorija: čitratuňipen
o tagi: sekularno digitalno esteticko in persona fotografija Zoran Dimov savorenge interno
Eva Davidová
kerdo: 17. 01. 2023 10:16 opre kerdo: 17. 01. 2023 10:17
E fotografija andal o Jekhetane-Spolu organizacijakro archivos, savi sikhavel e Eva Davidová, e prindžarďi romistka u fotografka, pro 5. Kongresos Maškarthemutňi Romaňi Unija (IRU), savo sas 24. dži o 28.7.2000 Prahate.
Pre fotografija hiňi jekhetanes aver dženenca pro kongresos.
Eva Davidová sas e prindžarďi artikaňi historička, etnografka, socijologička u fotografka. Sas maškar o džene, save opre ačhade e čechiko romistika. Jepaš pendavardešte beršendar chudľas te kerel e sistematicko etnologicko sikhľuviben pal o Roma u lengro dživipen.
e kategorija: čitratuňipen
o tagi: sekularno digitalno esteticko in persona fotografija Eva Davidová savorenge interno
Milena Hübschmannová
kerdo: 16. 01. 2023 15:22 opre kerdo: 16. 01. 2023 15:23
E archivno fotografija andal e organizacija Jekhetane-Spolu, pre savi hiňi e Milena Hübschmannová, e prindžarďi romistka, kana sas pro 5. Kongresos Maškarthemutňi Romaňi Unija (IRU), savo sas 24. – 28.7.2000 andre Praha.
Pre fotografija hiňi the o baro historikos u lingvistas Marcel Courthiade. Kadi fotografija sas andro Romano nevo ľil g. 448-454/2000 pre sera 14.
Doc. PhDr. Milena Hübschmannová, CSc. sas e bari čechiko univerzitno sikhavňi, savi ačhaďas e katedra vaš e romistika pre Filozoficko fakulta pre Karlovo univerzita Prahate.
Le beršestar 1951 dži o 1956 sikhľolas o čhiba hindu, urdu the bengali pre Filozoficko fakulta pre Karlovo univerzita Prahate. Le beršestar 1953 pes chudľas te interesinel pal e romaňi čhib, romaňi kultura u savoro dživipen sas aktivno andro romano emancipačno procesos.
Kidelas opre o romano folklor, paramisa, o vakeriben, giľa, goďaver lava, drabaripen u paľis the etnograficka informaciji.
e kategorija: čitratuňipen
o tagi: sekularno digitalno esteticko in persona fotografija Milena Hübschmannová savorenge interno
Marcel Courthiade
kerdo: 16. 01. 2023 15:03 opre kerdo: 01. 02. 2023 10:54
O fotografiji andal o archivos OZ Jekhetane-Spolu, save sikhaven le Marcel Courthiade, o prindžardo baro Rom, pro 5. Kongresos vaš e Maškarthemutňi Romaňi Unija (IRU), savo sas o 24. – 28. juloste 2000 Prahate.
Pre jekh fotografija hino jekhetanes la prindžarďa čechiko romistkaha Milena Hübschmannovaha (1933-2005). E fotografija sas andro Romano nevo ľil g. 448-454/2000 pre sera 14.
Marcel Courthiade sas o francuziko lingvistas u akademikos. Sikhľolas medicina pre univerzita andro Clermont-Ferrand, o študijum naagorinďas. Sikhľolas o slovaňika čhiba, paľis sas o ekspertos pre romaňi čhib, pal savi kerelas rodipena.
e kategorija: čitratuňipen
o tagi: sekularno digitalno esteticko in persona fotografija Marcel Courthiade savorenge interno
Ján Cibuľa
kerdo: 16. 01. 2023 13:52 opre kerdo: 16. 01. 2023 13:52
O archivna fotografiji OZ Jekhetane-Spolu, kaj hino o Ján Cibuľa, o baro prindžardo Rom, pro 5. kongresos IRU (Maškarthemutňi romaňi unija), savo sas 24.-28.7.2000 Prahate.
E fotografija sas andro Romano nevo ľil g. 448-454/2000 pre sera 14.
Ján Cibuľa, MUDr. (doktoris pre medicina,* 7. január 1932, Klenovec – † 18. august 2013, Bern) sas o slovaťiko doktoris, romano. Sas maškar o džene save kerde o Zvezos Cigana-Roma pre Slovaťiko, sas pro jekhto kidipen Maškarthemutňi romaňi unija andro Orpington. Sas o šerutno andre delegacija dešuduj Romenca andal o zapadna the vichodna them andro OSN (E Organizacija jekhetane nacijengri) andro New York u sas nominovano pro Nobeloskro moľipen vaš o smirom.
Avri phirďas o gimnazijum andre Rimavsko Sobota. Leskro das sas lavutaris. Andro berš 1957 sas o jekhto Rom andre puraňi Čechoslovakija, savo agorinďas e Medicinsko fakulta pre Komensko Univerzita Bratislavate. Andro berš 1968 sas jekh maškar o džene save kerde o Zvezos Cigana-Roma.
Sas o jekhto prezidentos IRU andro berš 1971.
e kategorija: čitratuňipen
o tagi: sekularno digitalno esteticko in persona fotografija Ján Cibuľa savorenge interno
Martin Kaleja-Januv
kerdo: 10. 01. 2023 11:12 opre kerdo: 10. 01. 2023 11:13
O fotografiji pal o čitripnaskre kidipena, save kerďas e themutnengri asocijacija Jekhetane-Spolu. O digitalizovano analogovo filmos andal o fotoaparatos. O than, o datumos u o fotografos nasas pisimen paš o analogovo filmos.
E fotografija sas kerďi prekal o projektos Giľavas u čitrinas vaš o kamiben prekal o kidipena andro Lipovce u Vyšné Ružbachy andro berš 2001. O artefakta u o kaštune skulpturi sas ole beršeste the andro avutne berša sikhade andro buter fora pre Slovaťiko.
Martin Kaleja-Januv (1984-) uľiľas andre romaňi osada Jarovňicate, kaj bešel. Ki o čitratuňipen peske arakhľas o drom kana sas pre zakladno škola, kaj les sikhavelas Ján Sajko, o sikhavno pro čitratuňipen. Paľis phirelas pre Maškarutňi umelecko škola andro Prešov, pre špecijalizacija dizajn u buťi le kašteha. Čitrinel u čhinel avri le kaštestar. Andro' da leskri nekh bareder tema hiňi sakralno - o paťaben andro Del. Buťi kerel sar o asistentos le sikhavneskro pre Zakladno škola Jarovňicate.
e kategorija: čitratuňipen
o tagi: sekularno digitalno esteticko in persona fotografija Martin Kaleja-Januv savorenge interno
Július Lakatoš
kerdo: 10. 01. 2023 10:47 opre kerdo: 10. 01. 2023 10:48
O fotografiji pal o čitratune kidipena, save kerelas e themutnengri asocijacija Jekhetane-Spolu. O digitalizovano analogovo filmos andal o fotoaparatos. O than, o datumos u o fotografos nasas paš o filmos pisimen. E fotografija sas kerďi prekal o projektos Giľavas u čitrinas vaš o kamiben pro kidipena andro Lipovce u Vyšné Ružbachy andro berš 2001. O artefakta u o kaštune skulpturi sas paľis andro kada the avutne berša sikhade andro buter fora pre Slovakija.
Július Laktoš - o insitno čitratuno, uľiľas andro gav Selice. O jekhto čitre chudľas te čitrinel la ceruzaha, paľis temperovo kolorenca. Pal o berša chudľas te čitrinel pro pochtan. O dominantno motivos hine o phuva. Čitrinelas ča jevende u raťate, kana andre leste baronas o idei, save chudľas kana chudelas mačhen pro Váhos. E romaňi tema načitrinelas, ča kana lestar mangle andal o romano muzeum. Leskro suno sas te čitrinel o purano romano pero (e romaňi uľica, o getos), kaj barolas.
Khatar:
RNĽ č. 384-391/1999, str.12, Róm s maliarskou paletou a štetcami
e kategorija: čitratuňipen
o tagi: sekularno digitalno esteticko in persona fotografija Július Lakatoš savorenge interno
