Tomáš Botló - vakeriben pal o romano bašaviben
kerdo: 27. 08. 2018 13:25 opre kerdo: 27. 11. 2020 02:00
Tomáš Botló - giľavel u bašavel, amaterikanes bašavel pre gitara, no nekh buter pre zongora, oda sikhľolas pro Themeskro konzervatorijum andre Braťislava. Kerel peskre autorska giľa, khere peske kerďas o študijo, u hino the but lačho hangoskro technikos. Tomáš del jekhetanes o romano bašaviben the o moderna žanri, sar hine o džez, funk, hip-hop, latino, flamenco, pop tu oda žanrovo sinkretizmus lestar kerel buchlo multikulturno the multižanrovo bašaldes. Kerelas jekhetanes buter slovaťika the avrune raperenca the artistenca. Leskro bašavibnaskro idealos hino o George Benson. Andro prezentimen video vakerel pal peskre bašavibnaskre jekhto uštara, sikhľuviben, vaj pal o špecifikane buťa u droma so lel o romano bašaviben pre Slovaťiko.
e kategorija: vakeriben
o tagi: leperiben biograficko monolog moderovano slovaťiko Tomáš Botló sakoneske interno
Barbora Botošová
kerdo: 18. 07. 2018 15:55 opre kerdo: 27. 11. 2020 02:00
Barbora Botošová - lakro papus sas Ján Berky Mrenica phureder (sas 33 berša o koncertmajstros andro Slovaťiko folklorno kolektivos), lakro dad hino o Eugen Botoš phureder (o primašis andro Violin Orchestra), lakro phral hino Eugen Botoš terneder (o prindžardo džezovo klaviristas, kompozeris). Andro berš 2012 e Barbora Botošová agorinďas o študijum - e lavuta - pre Uči škola vaš o muzicka džaňibena Bratislavate, ki o profesoris Peter Michalica. O kurzos vaš e kompozicija kerďas tel e prindžarďi Ľubica Čekovská. Akana hiňi e slobodno bašalďi, bašavel andro orchestri Bohémiens the Women Rebels. Lakro vakeriben hino phundrado, vakerel pal o peskre čhavorikane berša, pal o bašaviben, pal o študijum, lakre kompoziciji, the pal oda, savo hino o romano bašaviben akana, the andro historicko kontekstos.
e kategorija: vakeriben
o tagi: leperiben biograficko monolog moderovano slovaťiko Barbora Botošová sakoneske interno
Jozef Cichý - O drom ki o čitripen
kerdo: 04. 07. 2018 10:00 opre kerdo: 27. 11. 2020 02:00
Jozef Cichý (1966) - hino o romano čitratuno andal o Nižný Žipov, okres Trebišov. Avri sikhľiľas automechanikos, paľis ča čitrinelas. Leskro čitratuňipen rodelas e inšpiracija nekh buter khatar o Salvador Dalí, Leonardo da Vinci, Michelangelo Buonarotti the Rafael Santi. Čitrinel nekh buter le akrylovo the olejovo farbenca, o čitre kerel nekh buter pro pochtan the sololit. Buter čitre lestar hine pro fali andro khangera vaj andro pharipnaskre khera. O temi andro leskre čitre hine bi o sakralna motivi the o temi pal e fameľija, o mariben the romipen. Andro 90. berša chudľas o moľipen vaš o leskro čitripen pre sa slovaťiko kompeticija maškar o amaterska čitratune andro Trenčín. Leskre čitre sas sikade jekhetane aver romane čitratunenca andro Polťiko, andro Muzeum vaš e romaňi kultura Brnoste, Braťislavate pro sikaviben O jileskre čalavipena pre romaňi paleta, Perješiste, andro Michalovce pro sikaviben Romane čercheňa, vaj andro Stropkov. Leskre čitre hine akana andro ki o 30 gavende andro lengre pharipnaskre khera, andro varesave khangera, andro Muzeum vaš e romaňi kultura Brnoste the andro aver thana pre Slovaťiko the andro aver thema.
e kategorija: vakeriben
o tagi: leperiben biograficko monolog moderovano slovaťiko Jozef Cichý sakoneske interno
Roman Godla
kerdo: 27. 12. 2017 12:08 opre kerdo: 09. 04. 2021 09:11
Roman Godla (1974 - ) hino imar but berša o džen andro Teatro Romathan, andre leskri kheľibnaskri the khelavibnaskri sekcija. Prekal o berša andro teatros pes chudľas te interesinel buter pal e choreografija. Oda kerel the akana. Andro video vakerel pal o leskre jekhto uštara, pal o artistikane the personalna ambiciji.
e kategorija: vakeriben
o tagi: leperiben biograficko monolog moderovano romanes Roman Godla sakoneske interno
JUDr. Gustáv Karika - vakeriben
kerdo: 22. 12. 2017 08:19 opre kerdo: 27. 11. 2020 02:00
JUDr. Gustáv Karika (1930 - 2016) uľiľas pre Myjava, andre romaňi osada. Sas maškar o jekhto pravňika, Roma, andre puraňi Čechoslovakija. Andro vakeriben, savo sas kerdo 12.5.2014 andre Nevi Dubnica, kaj bešelas, vakerel pal e biografia the faktografia u o temi hine prekal e fameľija, škola, sikhľuviben, karijera, dži ki o historikane buťa, save forminde amaro geopolitikano than dujto lumakro maribnastar dži akana. Andro leskro vakeriben hine varesave termini, nava, save pen imar normalno na sikhaven andro amare školi, vaš oda anas the o charno glosaris.
Asocijacija Cigana-Roma (1969 – 1973) Sas kerdo sar e khetaňibnaskri organizacija andro avka vičhindo nevipnaskro procesos andre Čechoslovakija, o res sas te resel o ekvivalentno the na konfliktno dživipen vaš o Roma u te kovľarel e asimilacija, savi kerelas o štatos. Kana andro 1973 berš chudľas e normalizacija, e organizacija phandle.
Butiker/Nevodrom - o ekonomikane organizaciji prekal e Asocijacija Cigana-Roma. Kerelas o buťakre thana le Romenge, denas buťi romane manušenge, save sas remeselňika, kerenas o buťakre firmi.
Andrej Andrejevič Vlasov (14.9.1901 – 2.8.1946) O sovijetsko generalos, rusiko nacija. Pal o mariben vaš o Leningrad pes chudľas andre ňemciko bertene, kerelas jekhetane le nacistenca, kerďas e Rusiko slobodno aramada.
Vlasovci – o manuša save džanas pal o general Vlasov, e armada kaj sas o sovijetska slugaďa, so len chudle o Ňemci the o džene, save ke lende avle, o emigranta u ola, save na kamenas o komunizmus (stalinizmus).
Rudolf Slánský - (31.7.1901, Nezvěstice – 3.12.1952, Praha) O generalno sekretaris ÚV KSČ andro berša 1945 – 1951). Andro berš 1951 sas phukado, hoj kerel e anti štatoskri konšpiracija, andro mište prindžarde politikane procesi les bičhade pro meriben u paľis les murdarde. E kris kerďas leskri rehabilitacija andro berš 1963 u e komunistikaňi sera andro berš 1968.
e kategorija: vakeriben
o tagi: leperiben biograficko monolog moderovano slovaťiko JUDr. Gustáv Karika sakoneske interno
Pavel Klinec - Vakeriben
kerdo: 18. 12. 2017 15:04 opre kerdo: 27. 11. 2020 02:00
Pavel Klinec pal o Dúbravy, okresis Detva, andro leperibnaskro vakeriben vakerel sar dživelas leskri fameľija, o dad, e daj, o phrala, o prindžarde manuša andro dujto lumakro mariben. Leskre leperibena hine leskra datar, phureder phralestar, savo sas prekal o mariben 14 beršengro, the olestar, so ov korkoro predžidžiľas, kanastar sar štar the jepaš beršengro čhavoro. O dokumentos sas kerdo andro Dúbravy, okresis Detva, 19.7.2016.
e kategorija: vakeriben
o tagi: leperiben biograficko monolog moderovano slovaťiko Pavel Klinec sakoneske interno
Marián Balog - hercos, dramaturgos, režiseris
kerdo: 12. 12. 2017 15:41 opre kerdo: 27. 11. 2020 02:00
O leperibnaskro vakeriben le hercoha, dramaturgoha the režiseriha andal o Teatro Romathan, Marianoha Balogoha. Andro teatro avľas andro berš 1992. Le beršestar 2009 andro teatro bi o kheľiben kerel the e dramaturgija the režija. O prindžaripena pal o teatro les sas imar anglo berš 1992, kana sas andro Teatro Jonaš Zaborsky andro Prešov. Bi o teatro kerelas angomis the filmos. Andro berš 2000 sas jekh maškar o nekh bareder roli andro filmos (produkcija: Čechiko, Slovaťiko, Francuziko) savo pes vičhinelas O vakeriben pal o drom, so kerde o študenta Peter the Jakub. Andro berš 1995 chudľas vaš leskri buťi o moľipen la Asocijacijatar vaš o teatroskre manuša pre Slovaťiko the le Slovaťiko literarno fondostar.
Aver moľipena:
2006 – Literarno fondos – o moľipen vaš o baro umelecko the režijno buťariben vaš e inscenacija E butdžanďi fameľija,
2007 – O moľipen khatar o foros Košice vaš e bari buťi vaš o Teatro Romathan, but berša umelecko buťi andro teatro u vaš e talentimen režijno buťi, savi akana kerel o centralno repertoaris andro teatro.
2016 – Literarno fondos – o beršeskro moľipen vaš e režija andre originalno romaňi bašavibnaskri paramisi Magicko harangoro.
e kategorija: vakeriben
o tagi: leperiben biograficko monolog moderovano slovaťiko Marián Balog - teatroskro sakoneske interno
Maryša
kerdo: 12. 12. 2017 15:18 opre kerdo: 27. 11. 2020 02:00
Marie Oláhová (1963-), prindžarďi sar e Maryša Detvatar, hiňi e umelecko šerutňi, e šerutňi andre giľavipnaskri sekcija u e kheľibnaskri pedagogička andro romano folklorno suboris Romka. O suboris chudle jekhto te kerel o Juraj Berky the o Ľubomír Oláh Detvate andro berš 1987. Andro suboris chudľas e Maryša te kerel le beršestar 1989. Prekal o lakre vasta pregele šela romane čhavore u terne manuša. E Marie Oláhová u lakro vakeriben sas dokumentimen 20.7.2016 andro Centrum vaš o slobodno idejos Trend Detvate. O video sikavel Maryša sar vakerel pal oda, sar pes chudľas te kerel u forminel o suboris Romka. Phenel pal oda, sar avri len o uraviben, o bašaviben vaj o giľa u vakerel pal o nekh bareder motivaciji the o manuša, save oda suboris forminde u kerde. Vakerel pal oda, save hine o Roma, savo hino o romano bašaviben the e romaňi kultura.
e kategorija: vakeriben
o tagi: leperiben biograficko monolog moderovano slovaťiko Marie Oláhová sakoneske interno
Eva Adamová
kerdo: 12. 12. 2017 15:15 opre kerdo: 27. 11. 2020 02:00
Eva Adamová hiňi jekh džeňi andro Teatro Romathan le beršestar 2002. Lakre jekhto uštara andro teatros sas andro kheľibnaskro kotor, paľis lokhes chudľas o roli u pro agor the o giľavipen. Bi oda, hoj khelel andro teatroskre kotora, hiňi the e externo pedagogička pro Privatno konzervatorijum andro Košice, kaj sikhavel terne romane čhaven pal o teatros the kheľiben. O digitalno kulturno objektos sas kerdo 7. majoste 2013 andro kher kaj bešelas o Teatro Romathan pre Štefanikovo uľica 4 andro Košice. Eva Adamová odoj vakerel pal peskri teatroskri the pedagogicko karijera. Lakri buťi andro teatros hino sikado prekal o video andal o sikhľuviben the kheľiben so keren o manuša andal o Teatro Romathan.
e kategorija: vakeriben
o tagi: leperiben biograficko monolog moderovano slovaťiko Eva Adamová sakoneske interno
Karel Adam
kerdo: 12. 12. 2017 15:09 opre kerdo: 27. 11. 2020 02:00
Karel Adam, DiS.art, (1953-) hino o profesijonalno lavutaris − primašis, dirigentos, u kana sas o vakeriben kerdo, the o šerutno (1998-2016) andro profesijonalno romano teatro Romathan. Kana agorinďas o Themeskro konzervatorijum Kašate geľas te kerel andro agenturi Slovkoncert the Pragokoncert. Kana agorinelas o berš 1992 geľas te kerel andro nevo kerdo teatro Romathan sar o šefdirigentos andro teatroskro orchestros. Karel Adam vakerel pal o peskro čhavoripen, pal oda, sar chudľas te kerel e buťi andro teatro Romathan. Vakerel pal o uštara, sar pes vazdelas o teatro, u pal o moľipena, save ada teatro kamel te del le manušenge, save aven. Sajekh, vakerel pal o termini sar o romano bašaviben, e romaňi kapela, akanutňi romaňi bašavibnaskri produkcija, autenticita.
e kategorija: vakeriben
o tagi: leperiben faktograficko monolog moderovano slovaťiko Karel Adam sakoneske interno
